Axxam >> Isalen n tiddukla >> Timlilit : Aγsenfar n Tiddukla Tadelsant Apulee

Timlilit : Aγsenfar n Tiddukla Tadelsant Apulee

lundi 23 fuṛar 2009, s yimru n amghid

Addad ideg yella wedlis s umata di tmurt-nneγ d win ur ngerrez ara. Ma nehder-d γef wedlis yuran kan s tmaziγt, acku d wagi i γ-yecqan ugar, wagi yettmagar-d uguren imeqqranen, ama d ayen yeεnan tamsalt n useẓreg-ines neγ d ayen nniḍen. Ar ass-a, mazal anda, yiwen wemyaru am Aεmer Mezdad yessufuγ-d idlisen-is γaf ddema n umeskar ! Di tmura irebḥen, amyaru yewwi-d fella-s ad yaru u cceγl-is yefra da. Tugett seg yimyura s tmaziγt ur ufin ara tiẓrigin ara d-yessufγen ayen uran, tagnitt ur ten-tssuεed ara, dγa ur bddiden ara kan di tira uγalen d imaẓragen, ssufuγen-d d nutni idlisen-nsen u rnun ferqqent-ten γaf wid ara ten-yeγren. Ha-tt-an liḥala ideg d-ggran imyura-nneγ !

Seg wuguren nniḍen i d-yettmaggar wedlis yuran s tmaziγt yella win n ussiweḍ-is ar ger ifassen imeγriyen. Ddeqs n yidlisen d-yeffγen yakan, i wakken ad ten-tefeḍ ass-a di temkerdiyin neγ di tesdlisiyin, yessefk ad d-kkeḍ akk tamurt u akken wissen m’ad ten-tafeḍ. Ad nesmekti d akken, ameskar m’ara yettaru, yettaru i wakken ad teγren wiyaḍ ; u tamsalt n yedrimen terna-d s ufella : acḥal d win d-yessufγen idlisen-is i yi-iman-is, u yerna yerna-ten ula si lib-is ? Deg ubdil ad d-yeṛbeḥ idrimen, ad iγellet tidi-s, ixṣṣer-iten.

Si tama nniḍen diγen, yella wugur n imeγriyen : drus maḍi wid yeqqaren idlisen s tmaziγt. Annect-a yurez γer temsalt n uselmed n tutlayt-agi. Gar cwiṭ n wid-nni yeqqaren ass-a s tmaziγt, ama d ungalen, d tullizin, d tamedyazt, d amezggun neγ d imagraden di Internet d wid i tt-ilemden di tddukliwin neγ di tesdawiyin d iγerbazen. Asirem-nneγ, d agimen (luluf) n inalmaden tt-yeṭṭafaren ass-a deg uγerbaz ara yillin d imeγriyen uzekka.

Iswi n tiddukla-ya-nneγ ara d-nessker d asnefli d wesnerni n wedlis, ama s usebγes, talellet n yimyura yettarun yakan akken ur ssrussun ara imru, neγ asebγes n wiyaḍ ad t-refden. Akken diγen ara neg imahilen i usebγes n tγuri. Γas akken adeg ara yeṭṭef wedlis yuran s tmaziγt yugar wiyaḍ, maca, ur nebddid ara kan deg-s, akken diγen, ma yella tettunefka-aγ tegnitt, ad d-nelhi ula deg idlisen yuran s tefṛansist, s taεrabt, s teglizit neγ s tutlayin nniḍen. S umata deg ahil-nneγ ad yilli :
- Asebγes n inalmaden γer tγuri.
- Tallelt n yimyura imaynuten ad d-ssufγen idlisen-nsen.
- Asebγes n imyura imaynuten s uheggi n timzizal n tsekla, anda imenza d-yufraren, d nekkni ara d-yessufγen tiktabin-nsen
- Asbeddi n warrazen n tsekla (neγ d ayen nniḍen), anda ara nefk tarzeft i imawlan n yedlisen d-yufraren.
- Asegrew n yedlisen i wakken ad ten-nefk i temkaridiyin n tudrin d leεrac.
- Tikci n warrazen i yinalmaden d-yufraren.
- ....

3262 Iznan n wenmager